marzo no Lar: enxergando o País na pantalla e a pé

Chega o mes de marzo cheo de actividade en Cultura do País. Semanalmente teremos unha proxección do IV ciclo de documentarios ‘Enxergando o País’, que nesta nova edición amosará os seguintes proxectos:

  • xoves 7 de marzo: ‘XX anos de bravío (1994-2014)’, dirixido por Anna Diz e producido por Chantada Films, que analiza o movemento bravú.
  • venres 15 de marzo: ‘Unha Gran Burla Negra. Creatividade popular e memoria do Prestige (2002-2019)’, curta documental de Caneca Films sobre  a explosión de protesta creativa que resultou da marea negra do 200 e a mobilización do mundo da cultura ante a catástrofe do Prestige.
  • venres 22 de marzo: ‘Pucho Boedo. Un crooner na fin do mundo’, dirixido por Xurxo Souto, que reconstrúe a vida e a obra do mítico cantante dos Tamara que fixo renacer a música galega a partir de clásicos da nosa literatura.
  • venres 29 de marzo: ‘Tecido resistente. A silenciosa revolución das mulleres de Présaras’, dirixido por Marina Chiavegatto, sobre o empoderaento e a transformación da vida das traballadoras da fábrica ‘Hilados y Tejidos’ de Vilasantar.
  • venres 5 de abril: ‘Redes contra a política do espolio. Aire, auga e terra limpas’, dirixido por Xosé Bocixa e coa colaboración de Nós Televisión, sobre o traballo das plataformas Mina Touro – O Pino Non e varios colectivos en defensa do rural contra os impactos da minaría, a xestión insustentábel dos resíduos e os parques eólicos.

Todas as sesións serán no Lar da Cultura do País ás 20:30 hs. e contaremos membros dos proxectos audiovisuais e plataformas cuxas loitas son reflectidas neles.

O domingo 24 de marzo de 16:00 a 21:00 no Lar impartirase un curso de manipulación de alimentos para a obtención do certificado de formación en hixiene alimentaria, que será entregado ás persoas asistentes. O prezo do curso é de 10 euros (de balde para socios/as de Cultura do País) e podedes inscribirvos en culturadopais@gmail.com

E a última fin de semana de mes… toca roteiro! Desta volta, organizado en colaboración coa Fundaçom Artábria e Asociación Cultural Ferrolterra Antiga. O domingo 31 de marzo sairemos ás 8:30 da Facultade de Formación do Profesorado para repartirnos en carros. Pola mañá faremos un roteiro polo patrimonio medieval de Chanteiro, Montefaro e Cervás. Xa pola tarde, logo dun xantar de confraternidade na Fundaçom Artábria, percorreremos a historia e o patrimonio da cidade de Ferrol. A inscrición custa 12 euros (10 euros para socios/as das tres entidades organizadoras) e podédela facer tamén no noso enderezo de correo electrónico.

Domingo 24 de febreiro: roteiro e cocido no Deza

O último domingo do mes de febreiro organizamos un roteiro pola comarca do Deza. Sairemos ás 8:30 da Facultade de Formación do Profesorado para repartirnos en carros e dirixirnos até a área recreativa da Carixa, en Vila de Cruces. Veremos o mosteiro de Carboeiro, a fervenza do Toxa e xantaremos o que din que é un dos mellores cocidos do País. O prezo da actividade é de 35 euros (30 para socios/as de Cultura do País) e as prazas son moi limitadas. Podédesvos anotar en culturadopais@gmail.com.

domingo 27 de xaneiro: roteiro pola Terra Chá

O vindeiro domingo 27 de xaneiro temos programado un roteiro pola Terra Chá. Achegarémonos até o xacemento paleolítico de Pena Grande, que motivara unha campaña da nosa Asociación contra a súa subasta pública. Faremos un percorrido circular de 14 kms. no que visitaremos ademais a escola da Liga Santaballesa, a anta da Pedra Puída, a Medoña de Estelo, o castro de Santaballa e o dolmen da Roza das Modias. Quedamos ás 11:30 hs. no Lar para repartirnos en carros. Cómpre levar comida para ao camiño. Podédesvos anotar en culturadopais@gmail.com
Este roteiro fai parte dun calendario que impulsamos para este curso que marca unha viaxe nas últimas fins de semana de cada mes a unha comarca do País na que poremos en valor o noso patrimonio. Anotade nas vosas axendas!

xoves 24 de xaneiro: presentación de Ad Inferos

Comezamos o ano cunha proposta literaria: o poemario de Mónica Sánchez ‘Ad Inferos’, que toma o seu título da pasaxe mítica do descenso de Ulises ao inferno. Este poemario mestura referenzas mitolóxicas coa memoria persoal da autora e experimenta coa imaxe a través de poemas visuais. A presentación do libro, editado por Chan da Pólvora, terá lugar o vindeiro xoves 24 de xaneiro ás 20:30 no Lar da Cultura do País, e contará coa presenza da autora e máis do editor, Antón Lopo.

Decembro: Natal 71 e A gran travesía de Chiruca Macallás

Neste mes de decembro en Cultura do País lembramos o disco co que a ditadura portuguesa felicitou o Nadal aos militares mobilizados para a Guerra de Ultramar, coa proxección do documentario Natal 71. Este videoforo, que terá lugar o vindeiro venres 14 de decembro ás 21:00 no Lar da Cultura do País (Carril das Hortas, 1-baixo 5), será presentado e comentado polo profesor de portugués da Escola Oficial de Idiomas Uxio Outeiro, socio da nosa Asociación.

O xoves 20 de decembro ás 20:30 no Lar medra o mar e chega a Lugo. Traeranos o arrastreiro Macallás guiado na ponte por Chiruca e a viva voz de Xurxo Souto contando a historia dunha fantástica viaxe: ‘A gran travesía de Chiruca Macallás’. A presentación desta novela do mar onde as mulleres son as grandes protagonistas será unha boa oportunidade para lembrarmos e facermos soar nas nosas gorxas as cantigas das traballadoras da conserva.

Medre o Mar!

17 e 18 de novembro: Centenario do Manifesto de Lugo

Este ano faise un cento da celebración da primeira asemblea nacionalista, na que se aprobou o Manifesto de Lugo, efeméride que vimos conmemorando en Cultura do País ao longo dos nosos dez anos de vida. Con motivo do cen aniversario ampliamos a programación e redobramos esforzos, xuntándoos tamén a outros colectivos que teñen preparados actos para as datas referidas.
A meirande parte dos actos terán lugar no Hotel Méndez Núñez. Como en anos anteriores, o sábado 17 de novembro a partir das 21:30 celebraremos a Festa Dandi, que nesta ocasión contará con varias actuacións: Duende Circo, Microefectos Dramatúrxicos, As Ramilettes e Marqués de Vilapodre DJ set. As entradas, que se poderán retirar no Lar ou na Fouce de forma anticipada ou o propio día no Hotel, teñen un custo de 5 euros. Como en anteriores edicións, outorgaranse os Premios Dandi ás mellores caracterizacións coa estética dos anos vinte entre as persoas asistentes.
plataforma Vía Galega, entidade social en defensa dos dereitos nacionais de Galiza da que fai parte a nosa Asociación, ten programados unha serie de eventos o domingo 18 de novembro na nosa cidade con motivo do Centenario. A partir das 10:45 terá lugar no IES Lucus Augusti a Asemblea da plataforma, na que se aprobará a Carta de Dereitos do Pobo Galego.
Ás 13:00 diante do Hotel Méndez Núñez está prevista a celebración da ofrenda floral unitaria promovida, xa desde hai varios anos, xunto con outros colectivos da cidade, enmarcada na Convocatoria Faraldo. Seguidamente, ás 13:30 farase un roteiro polo adarve da Muralla promovido por Vía Galega, no que se dará lectura a varios textos das Irmandades da Fala.
Pola tarde, ás 17:00 de novo na Sala Almirante do Hotel Méndez Núñez representaremos a función ‘A lus da estrela que brila ó lexos, espectáculo de danza, poesía, teatro e música preparado por socios/as e simpatizantes da nosa Asociación en homenaxe aos asinantes do Manifesto de Lugo. A entrada é gratuíta. O título da función é recollido dun verso do poema ‘No Escuro’ (Vento Mareiro, 1915) de Ramón Cabanillas.

xoves 8 de novembro: Versos noctámbulos

O vindeiro xoves 8 de novembro a partir das 20:30 hs. presentaremos no Lar o último poemario de Ricardo Seixo, ‘Versos noctámbulos’. No acto participarán Adela Figueroa, coñecida poeta e activista social lucense, e o autor. Este é o segundo libro de poemas do coruñés Ricardo Seixo, despois de Ollares (2017). Adícase, ademais, á composición musical e o estudo do canciero tradicional galego e participa activamente na Asociación de Veciños da Agra do Orzán. Entende a poesía como un compromiso coa realidade social circundante e co seu país.

sábado 22 de setembro: roteiro polo Ribeiro

Alongamos o verán en Cultura do País e comezamos a tempada de roteiros cunha viaxe á comarca ourensá do Ribeiro, que terá lugar o vindeiro sábado 22 de setembro. Sairemos ás 9:30 de diante da Facultade de Formación do Profesorado, onde nos repartiremos en carros, e dirixirémonos á parroquia de Astariz (Castrelo de Miño), que será o centro dunha xornada de actividades: veremos o recentemente escavado castro de Astariz, que conserva un lagar milenario, os petróglifos de Reigoso e vestixios de minaría romana; facendo o xantar no camiño -recoméndase levar comida para o traxecto e calzado cómodo para andar-.

A xornada rematará cunha foliada en Astariz. O prezo da actividade é de 15 euros (10 euros para socios/as de Cultura do País), correspondente á cea e bebida da foliada. Podédesvos anotar en culturadopais@gmail.com até o venres 21 de setembro.

1918-2018: Centenario do Manifesto de Lugo

Este ano é especial para Cultura do País por varios motivos. Fanse cen anos da celebración da primeira Asemblea Nacionalista, no Lugo Salón e no Hotel Méndez Núñez, o 17 e 18 de novembro de 1918, data en que se ‘xuntaron na cidade, viñeron de toda a Patria’, como di a cantiga d’A Quenlla, membros das Irmandades da Fala e redactaron o primeiro programa político do nacionalismo galego: o Manifesto de Lugo.

Tamén se fan dez anos do nacemento de Cultura do País, 3.650 días e algún máis de activismo cultural cunha perspectiva autocentrada, acumulando outras tantas edicións da celebraciónd e actos de conmemoración do Manifesto de Lugo e da súa festa máis senlleira: a Festa Dandi. Polo tanto, para esta data de duplo aniversario e dada a relevancia dun feito centenario que sempre tivemos moi presente na nosa actividade, gardamos unha programación especial que queremos que teña a meirande repercusión posíbel. Presentámosvos hoxe a imaxe gráfica dos actos do centenario e nimámosvos a difundir a efeméride a participar dos actos que iremos avanzando nos vindeiros meses.